Önnur meðhöndlun

Strípun

Ef bleiur fara að leka vegna þess að innra birðið er orðið vatnshelt, bleiur sem keyptar eru notaðar eða til að hressa uppá bleiur er gott að strípa þær.

Aðferð

Strípun með uppþvottalegi: – gert þegar innrabirði bleiunnar er orðið vatnshelt af einhverjum orsökum. Hægt er að sjá hvort fita hefur komið í bleiuna með því að láta ískalt vatn renna á innra birðið, en þá sjást flekkir sem ekki blotna. Ef um stílafitu er að ræða, verður bletturinn líka harður. Þá seturðu uppþvottalög (því hann leysir vel upp fitu) í bleiurnar og nuddar honum vel inní efnið og nuddar efninu vel saman til að ná burt fitu eða öðru sem hefur sest í bleiurnar og gert þær vatnsheldar. Skolar þær síðan vel þannig að öll sápan fari úr og þvær þær síðan í þvottavél.
Á erlendum síðum er mælt með bláum Dawn, en hann er líka bakteríudrepandi.

Blettaeyðir

Sólin er í raun besti blettaeyðirinn. Leggja blautar/þurrar bleiur út í sólina og sólir sér um að eyða blettunum. Einnig er hægt að setja bleiur bara í gluggakistuna og láta dagsbirtuna vinna á þeim (eins og yfir vetrartímann) en það getur tekið lengri tíma fyrir blettina að fara. Einnig hægt að nota á almennan fatnað (barnaföt) til að ná appelsínugulu matarblettunum úr fötunum.

Sítrónusafi. C-vítamínið í sítrónusafanum hefur hvíttandi áhrif og það getur verið gott að nota hann með sólinni, ss sprauta safanum á blettina og setja svo út í sólina, en oft dugar bara að nota sólina.

Gallsápa virkar vel til að ná blettum úr efnum, sérstaklega náttúrulegum blettum eins og matarleyfum og kúkablettum. Best er að nota sápuna á efnið áður en það er þvegið. Sumir setja bleiur eina umferð á skol í vélinni fyrst og nudda síðan gallsápunni í blettina en öðrum finnst sápan vinna best sé hún notuð strax á blettinn. Þá er allur kúkur skolaður úr bleiunni (yfirleitt fer flest allt í hríspappírinn sem er sturtað niður og svo bara litur í bleiuna). Síðan er sápunni nuddað í blettinn og burstuð úr með naglabursta ef þörf er á. Gallsápu er hægt að fá í heilsubúðum eða í Þumalínu frá Litla ljósinu.

Að lanólínera ullarbuxur

Ódýrasta aðferðin er að nota hreint lanólín eins og er í brjóstakreminu í fjólubláu túpunni.

Þú þarft- bala (ef þú vilt ekki fá fiturönd í vaskinn),- litla krukku,- brjóstakremið,- ullar- eða barnasjampó,- sjóðandi vatn, og- ofnahanska.
Blandaðu 30-35°C stiga heitu vatni, bleyttu buxurnar og þvoðu þær með pínulitlu, mildu ullar- eða barnasjampói. Skolaðu þær við sama hitastig.

Næst seturðu í litla krukku 1 cm af brjóstakreminu fyrir hverjar buxur, sem þú vilt lanólísera og fyrir hvern sentímeter er settur einn dropi sjampó. Fyrir fjórar buxur þarftu þá 4 cm fitu og 4 dropar sjampó. Ef þú lanólíserar ónotaðar buxur í fyrsta skiptið, er þér óhætt að nota 1,5 cm af lanólíninu.

Helltu næst sjóðandi vatni í krukkuna þína, farðu í hanskana til að brenna þig ekki, lokaðu krukkunni vel og hristu hana almennilega og lengi, þangað til að brjóstakremið hefur leyst sig upp og mjólkurkennd blanda er orðin til.

Láttu handvolgt vatn í balann og dreifðu fitublöndunni út í það. Athugaðu, að hitastigið sé ekki of hátt fyrir buxurnar, áður en þú lætur þær ofan í vatnið. Blautu buxurnar eru settar í og aðeins ýtt á þær og hreyft í vatni, líka snúið við, svo að fitan geti farið auðveldlega inn í alla þræði. Látið buxurnar liggja í friði í 10- 15 mínútur.

Taktu buxurnar upp úr og pressaðu mestu vætuna úr þeim. Og leggðu þær til þerris.

Athugið að þetta er líka hægt að gera við lopavettlinga og lopasokka til að vatnsverja þá – gott að gera fyrir veturinn.

(Upplýsingar fengnar frá Litla ljósinu)